Desishon pa salbaguardiá fondo di penshun, kuminsa prepará penshun obligatorio i konkretisá NAF.1000,- minimo pa grandinan

KOMUNIKADO DI PRENSA - GOBIÈRNU DI KÒRSOU:

22-01-2012

Willemstad- Konseho di Minister, riba proposishon di Minister enkargá ku Desaroyo Sosial,
Trabou i Bienestar, Hensley Koeiman a bai di akuerdo ku algun akshon konkreto pa salbaguardiá
e fondo di penshun di behes pa awor i futuro. Na mes momentu Konseho di Minister a bai di
akuerdo tambe ku e proposishon di Minister Koeiman pa hasié posibel pa nos grandinan ku ta
risibí AOV so risibí Nafl.1.000,- den nan man. Por último Konseho di Minister a bai di akuerdo
tambe pa enkargá e komishon “Ouderdomvoorziening” pa bin ku un proposishon konkreto pa
introdusí penshun obligatorio na Kòrsou. E proposishon mester keda entrega pa mas tarda dia
promé di yüli 2012. E desishonnan aki ta parti di un maneho dirigí di Minister Koeiman pa krea un bienestar
duradero pa nos pueblo i prinsipalmente pa nos grandinan.

“E desishonnan aki ta forma parti di un maneho dirigí ku nos ta hiba pa reformá nos penshun i
perkurá ku kada suidadano tin un bida hustu. Un bida kaminda e ta doño di su propio bienestar.
Mi ta konsiente ku kambio ta trese insiguridat. Tin kambio sinembargo ku nos mester hasi
na bienestar di nos komunidat. Ta nos intenshon pa próksimamente informá, splika i aklará
na komunidat kontinuamente riba e desishonnan tuma i e rumbo ku nos ta kana pa logra nos
metanan. Pueblo por konta ku nos lo traha i lucha ku determinashon pa logra e meta pa kada
grandi den nos komunidat por gosa di su edat di oro trankil i ku su mes bienestar den su man.
Un parti importante di mi maneho ta pa krea e kondishonnan pa e hende por hasi esaki.”
Minister Koeiman a bisa.

Akshon konkreto pa salbaguardiá fondo di penshun
Nos tur tin derecho di ora nos yega edat di baha ku penshun di por hiba un bida hustu. Minister
Koeiman su maneho ta dirigí pa trese e reformanan nesesario pa garantisá esaki awor i den
futuro. No ta un sekreto ku nos fondo di penshun ta bou di un preshon enorme i ku mester
trese un kambio pa garantisá ku nos por sigui gosa di por lo mínimo un provishon di penshun
(AOV) ora nos bira grandi. Esaki ta algu ku organisashonnan gremial di dunadónan di trabou i
trahadónan a pidi.

Pa e motibu aki a tuma e desishon pa subi e edat di baha ku penshun pa 65 aña. E desishon ta
nifiká ku tur persona ku pa promé di yanüari 2012 tabatin 57 aña òf ta mas yòn lo kuminsá risibí
AOV ku 65 aña. Esnan ku tin 58 plùs lo por keda risibí e provishon ora nan yega e edat di 60
aña. Semper tin e fleksibilidat si pa e persona mes por disidí na ki momentu e ta baha. Kontal
ku e tene kuenta ku e loke e lo risibí na e provishon den su man ta dependiente di e momentu
ku e a skohé pa e baha. Komo tal e lo risibí tambe na e porshon di e kantidat di añanan ku ela
kontribuí.

E suidadano pues ta keda ku e libertat pa e mes por disidí ku e ta kla ku e proseso laboral i ke
kuminsá gosa di su penshun. E oumento di edat di penshun no ta úniko pa Kòrsou. Ta algu ku
rònt mundu nos ta mira keda introdusí. E ta relatá tambe na e echo ku hende por lo general ta
biba mas largu “hoy endia” i ainda por presta riba 60 aña. Konseho di Minister a disidí tambe ku entrante promé di yanüari 2012 pa subi e “loongrens” te na Nafl.100.000,-. Di e forma aki a dal un paso konkreto i importante pa por salbaguardiá nos fondo di penshun.

Un mínimo Nafl.1000,- di den man di nos grandinan ku ta risibí AOV so
Aparte di salbaguardiá e fondo Minister Koeiman a hañ’é sumamente importante pa wak kon
por aliviá nos grandinan, prinsipalmente esnan ku ta tin únikamente AOV komo nan forma di
penshun.

Pa e motibu aki Minister Koeiman a proponé i Konseho di Minister i a bai di akuerdo pa
gobièrnu traha konkretamente pa hasié posibel pa nos grandinan, ku mester biba di AOV
so, pa risibí un entrada di mínimo di Nafl.1.000,- tur luna den nan man. Gobièrnu lo kubri e
diferensha entre e AOV (mantené na Nafl.818,- normativo) i e Nafl.1000,- pa e personanan aki.
Departamentu di Finansa a keda enkargá pa wak kon por realisá esaki.

E desishon aki di gobièrnu ta habri espasio tambe pa, na un forma struktura, hiba un diálogo ku
gruponan den komunidat kon por garantisá, na un forma struktural, un oumento di e provishon
di behes (AOV) na un montante ku nos grandinan, prinsipalmente esnan ku tin ménos, por risibí
un entrada hustu pa nan por biba trankil di dje.

Konseho di Minister a disidí tambe pa pidi Banko di Seguro Sosial pa studia e posibilidat pa
indeksá AOV abase di kresementu ekonómiko.

Penshun obligatorio tei bira realidat
No ta un sekreto tampoko ku lamentablemente mayoria di nos grandinan te awor mester biba
di únikamente AOV komo penshun. Esaki no ta algu sano i no ta fomentá desaroyo sosial di
nos pueblo. Konseho di Minister riba proposishon di Minister Koeiman a bai di akuerdo ku
introdukshon di un penshun obligatorio. Ta trata aki di algu ku pa basta aña kaba sektornan
ta pidi pe pero gobièrnunan di turno no a tuma akshon pa konkretis’é. Konseho di Minister
riba proposishon di Minister Koeiman a bai di akuerdo ku e proposishon di e komishon
ouderdomsvoorziening pa presentá un proposishon konkreto na Konseho di Minister pa un
penshun obligatorio pa Kòrsou. E proposishon pa esaki mester keda entrega no mas lat ku 1 di
yüli próksimo. E proposishon mester kontené un fecha pa introdusí e penshun obligatorio. Ku
e desishon aki e trabounan por kuminsá tuma lugá pa por konkretisá penshun obligatorio pa tur
trahadó.