A record of publications from the Dutch Caribbean and Suriname

Programma di Gobernashon Bonaire 2016 - 2019

Bo dilanti bo tin e programa di gobernashon di Boneiru pa e periodo 2016 – 2019.
E programa di gobernashon a keda realisá ku koperashon di diferente gremio den nos komunidat. Esaki ta un di e ingredientenan di mas importante pa krea apoyo i un programa eksitoso. Ela keda kompilá ku i pa e komunidat Boneriano den su totalidat. Ta di importansia ku for di e promé kuminsamentu e komunidat sa kiko ta e intenshonnan di maneho di Kolegio Ehekutivo pa asina tur hende por sigui nan krítikamente tambe. Konsientemente Kolegio Ehekutivo ta asumí un posishon vulnerabel ku e meta pa engrandesé e partisipashon di tur sektor di nos komunidat den e maneho gubernamental.
Kolegio Ehekutivo ta di opinion ku e dunamentu di kuenta na Konseho Insular i komunidat tokante su akshonnan mester ta un kustumber evidente den un demokrasia habrí manera esun di nos. Pa e motibu aki e programa di gobernashon ta alabes un instrumento di guia i kòntròl.
E echo ku Kolegio Ehekutivo no a warda e 100 dia kustumbrá pa presentá e programa di gobernashon aki na Konseho Insular i komunidat, ta suprayá e importansia ku KE ta duna na gobernashon transparente i enbolbimentu di nos komunidat.
E programa di gobernashon ta sali for di e punto di bista di un identidat propio i e orguyo di e Boneriano. E Boneriano ku ta konsiente di su propio potensial i ku ta realisá ku su posibilidatnan pa loke ta trata desaroyo i kresementu avansá ta sin límite, netamente pa motibu di su karakter propio huntu ku su kultura i norma- i balornan propio. E Boneriano ku ta orguyoso di su propio historia, su struktura multikultural i su poblashon eksepshonal.
Huntu ku e Boneriano orguyoso aki nos Kolegio Ehekutivo ta deseá di konstruí un futuro sólido pa Boneiru.

Download PDF
Share this page:
« Back
Back to Top